Русская Православная Церковь утвердила новый чин молитвы за детей с тяжелыми заболеваниями и их семьи

На заседании Священного Синода Русской Православной Церкви, прошедшем под председательством Святейшего Патриарха Московского и всея Руси Кирилла в октябре в Даниловом монастыре Москвы, приняли важное решение: был утвержден специальный текст молебна об исцелении детей с тяжелыми заболеваниями и поддержке их родителей.

Церковь и ранее возносила молитвы о болящих, но не было специального текста, посвященного детям с тяжелыми заболеваниями и их семьям. Теперь верующие получат утвержденный Священным Синодом молитвенный текст, в котором каждая строка обращена к Богу с просьбой о силе и исцелении для детей, а также о терпении для их родителей.

Что это значит для верующих?

• Текст молитвы станет доступен для всех. Сам текст молитвословия опубликован на официальном сайте Московской Патриархии. Мы также приводим его ниже.

• Будет назначен специальный день для молитвы. Этим днем определена дата 1 октября — день памяти иконы Божией Матери «Целительница». В этот день молитвы из нового чина включат в Божественную литургию, после которой будут совершаться молебные пения.

• Молитву можно совершать в любое время. Синод подчеркнул, что Церковь готова откликаться на просьбы верующих и совершать молебны в любой день года, если это необходимо.

Решение Синода показывает, что Церковь стремится быть рядом с людьми в их беде. Новый чин молебного пения станет духовным утешением для семей, оказавшихся в трудной жизненной ситуации.

*** 

ЧИН МОЛЕБНАГО ПЕНИЯ

О ИСЦЕЛЕНИИ ДЕТЕЙ ТЯЖКО БОЛЯЩИХ

И О РОДИТЕЛЕХ ИХ

Диа́кон: Благослови́, влады́ко.

Свяще́нник: Благослове́н Бог наш, всегда́, ны́не и при́сно, и во ве́ки веко́в.

Лик: Ами́нь.

Диа́кон: Сла́ва Тебе́, Бо́же наш, сла́ва Тебе́.

И вси людие: Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды).

Сла́ва, и ны́не:

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды.)  

Сла́ва, и ны́не: О́тче наш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Свяще́нник: Я́ко Твое́ есть ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Чтец: Ами́нь. Го́споди, поми́луй. (12 раз.)

Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 114

Возлюби́х, я́ко услы́шит Госпо́дь гла́с моле́ния моего́, я́ко приклони́ у́хо Свое́ мне́, и во дни́ моя́ призову́. Объя́ша мя́ боле́зни сме́ртныя, беды́ а́довы обрето́ша мя́, ско́рбь и боле́знь обрето́х, и и́мя Госпо́дне призва́х: о, Го́споди, изба́ви ду́шу мою́. Ми́лостив Госпо́дь и пра́веден, и Бо́г на́ш ми́лует. Храня́й младе́нцы Госпо́дь: смири́хся, и спасе́ мя́. Обрати́ся, душе́ моя́, в поко́й тво́й, я́ко Госпо́дь благоде́йствова тя́. Я́ко изъя́т ду́шу мою́ от сме́рти, о́чи мои́ от сле́з и но́зе мои́ от поползнове́ния. Благоугожду́ пред Го́сподем во стране́ живы́х.

Слава, и ныне:

Аллилу́иа, аллилу́иа, аллилу́иа, сла́ва Тебе́, Бо́же. (Три́жды.) 

Ектения́ вели́кая:

Ми́ром Го́споду помо́лимся.

На каждое прошение лик: Го́споди, поми́луй.

О свы́шнем ми́ре и спасе́нии душ на́ших, Го́споду помо́лимся.

О ми́ре всего́ ми́ра, благостоя́нии Святы́х Бо́жиих Церкве́й и соедине́нии всех, Го́споду помо́лимся.

О святе́м хра́ме сем, и с ве́рою, благогове́нием и стра́хом Бо́жиим входя́щих вонь, Го́споду помо́лимся.

О вели́ком господи́не и отце́ на́шем Святе́йшем Патриа́рхе Кири́лле, и о господи́не на́шем высокопреосвяще́ннейшем митрополи́те (или́: архиепи́скопе, или́: преосвяще́ннейшем епи́скопе имяре́к), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

О богохрани́мей стране́ на́шей, власте́х и во́инстве ея́, Го́споду помо́лимся.

О гра́де сем (или́: о ве́си сей, или́: о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.

О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

О пла́вающих, путеше́ствующих, неду́гующих, стра́ждущих, плене́нных, и о спасе́нии их, Го́споду помо́лимся.

Прилага́ет и сия́:

О е́же призре́ти на младе́нцы и о́троки лю́те стра́ждущия, и исцели́ти всяк неду́г и вся́ку боле́знь в них гнездя́щуюся, Го́споду помо́лимся.

О е́же ми́лостивно услы́шати глас моли́твы нас недосто́йных рабо́в Свои́х, к Нему́, я́коже жена́ ханане́йска, вопию́щих, и я́коже тоя́ дщерь поми́ловати и исцели́ти де́ти боля́щия, Го́споду помо́лимся.

О е́же вско́ре, я́коже сы́на му́жа царе́ва и дщерь Иаи́рову, сло́вом си́лы Своея́ воста́вити, и от боле́зни ско́ро изба́вити их, Го́споду помо́лимся.

О е́же прия́ти моли́твы и воздыха́ния роди́телей и сро́дников их, Го́споду помо́лимся.

О избáвитися и́м же и нaм от вся́кия ско́рби, гне́ва и нýжды, Го́споду помо́лимся.

Заступи́, спаси́, поми́луй и сохрани́ нaс, Бо́же, Твоéю благодáтию.

Пресвятýю, Пречи́cтую, Преблагословéнную, слáвную Влады́чицу нáшу Богоро́дицу и Присноде́ву Мари́ю со все́ми святы́ми помянýвше, сáми себе́ и дрyг дрýга, и вeсь живо́т нaш Христу́ Бо́гу предади́м.

Лик: Тебе́, Го́споди.

Свяще́нник возглашáет:

Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

И а́бие диа́кон глаго́лет:

Бог Госпо́дь, и яви́ся нам, благослове́н Гряды́й во И́мя Госпо́дне.

Стих 1: Испове́дайтеся Го́сподеви, я́ко Благ, я́ко в век ми́лость Его́.

Стих 2: Обыше́дше, обыдо́ша мя, и И́менем Госпо́дним противля́хся им.

Стих 3: Не умру́, но жив бу́ду, и пове́м дела́ Госпо́дня.

Стих 4: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей, и есть ди́вен во очесе́х на́ших.

Лик: Бог Госпо́дь: во глас 4, к коему́ждо стиху́.

Та́же тропáрь, глaс 4:

Ско́рый в заступле́нии еди́н сый, Христе́,/ ско́рое свы́ше покажи́ посеще́ние стра́ждущим младе́нцем и отроко́м/ и изба́ви от неду́г и го́рьких боле́зней/ и, я́коже Иаи́рову дщерь воста́вил еси́,/ воздви́гни их во сла́ву и́мене Твоего́,/ моли́твами Богоро́дицы,// Еди́не Человеколю́бче.

Сла́ва, глас 2:

Я́коже муж царе́в,/ его́же сы́на исцели́л еси́, Христе́,/ к Тебе́ прибега́ем с ве́рою и упова́нием,/ из глубины́ души́ со умиле́нием моля́ще:/ исцели́ ча́да, лю́те стра́ждущая./ Ты бо чуде́с заре́ю мир просвеща́еши// и вся мо́жеши, я́ко Человеколю́бец.

И ны́не, ико́не Богома́тере, имену́емой «Цели́тельница», глас 1:

Любо́вию, Чи́стая Де́во, Твою́ святу́ю ико́ну почита́ющим,/ и Бо́жию Тя и́стинную Ма́теpь пpославля́ющим,/ и ве́pно поклоня́ющим Ти ся/ Цели́тельница яви́ся,/ вся́кое зло и боле́зни от сих удаля́ющая,// я́ко Всемогу́щая.

Диа́кон: Во́нмем.

Свяще́нник: Мир всем.

Лик: И ду́хови твоему́.

Диакон: Прему́дрость, во́нмем.

Чтец: Проки́мен, глaс 4: Ми́лостив Госпо́дь и пра́веден, и Бо́г на́ш ми́лует.

Стих: Храня́й младе́нцы Госпо́дь: смири́хомся, и спасе́ нас.

Диа́кон: Прему́дрость.

Чтец: Дея́ний святы́х апо́стол чте́ние.

Диа́кон: Во́нмем.

И чте́ние Дея́ний святы́х апо́стол, зач. 23 (Дея́н. 9, 32-42)

Во дни о́ны, бысть Петру́, посеща́ющу всех, сни́ти и ко святы́м живу́щим в Ли́дде. Обре́те же та́мо челове́ка не́коего, и́менем Ене́а, от осми́ лет лежа́ща на одре́, и́же бе разсла́блен. И рече́ ему́ Петр: Ене́е, исцеля́ет тя Иису́с Христо́с, воста́ни с посте́ли твоея́. И а́бие воста́, и ви́деша его́ вси живу́щии в Ли́дде и во Ассаро́не, и́же обрати́шася ко Го́споду. Во Иоппи́и же бе не́кая учени́ца, и́менем Тави́фа, я́же сказа́ема глаго́лется: се́рна, сия́ бя́ше испо́лнена благи́х дел и ми́лостынь, я́же творя́ше. Бысть же во дни ты́я, боле́вшей ей умре́ти, омы́вше же ю́, положи́ша в го́рнице. Близ же су́щей Ли́дде Иоппи́и, ученицы́ слы́шавше, я́ко Петр есть в ней, посла́ша два му́жа к нему́, моля́ще его́ не облени́тися приити́ до них. Воста́в же Петр и́де с ни́ма, его́же прише́дша возведо́ша в го́рницу, и предста́ша ему́ вся вдови́цы пла́чуща, и показу́юща ри́зы и оде́жды, ели́ка творя́ше с ни́ми су́щи Се́рна. Изгна́в же вон вся Петр, прекло́нь коле́на помоли́ся, и обра́щься к те́лу, рече́: Тави́фо, воста́ни. Она́ же отве́рзе о́чи свои́, и ви́девши Петра́, се́де. Пода́в же ей ру́ку, воздви́же ю́, и призва́в святы́я и вдови́цы, поста́ви ю́ жи́ву. Уве́дано же бысть се по всей Иоппи́и, и мно́зи ве́роваша в Го́спода.

Свяще́нник: Мир ти.

Чтец: И ду́хови твоему́.

Диакон: Премудрость.

Чтец: Аллилýия, глaс 4.

Стих: Взыска́х Го́спода, и услы́ша мя, и от всех скорбе́й моих изба́ви мя.

Стих: Приступи́те к Нему́ и просвети́теся, и ли́ца ва́ша не постыдя́тся.

Диа́кон: Прему́дрость, про́сти, услы́шим свята́го Ева́нгелия.

Свяще́нник: Мир всем.

Лик: И ду́хови твоему́.

Свяще́нник: От Ма́рка свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Диа́кон: Во́нмем.

И чтет свяще́нник Ева́нгелие от Марка, зач. 20 (Мк. 5, 22-24, 35 - 6, 1):

Во вре́мя о́но, прии́де ко Иису́су еди́н от архисинаго́г, и́менем Иаи́р, и ви́дев Его́, паде́ при ногу́ Его́ и моля́ше Его́ мно́го, глаго́ля, я́ко дщи моя́ на кончи́не есть, да прише́д возложи́ши на ню ру́це, я́ко да спасе́тся и жива́ бу́дет. И и́де с ним, и по Нем идя́ху наро́ди мно́зи.

И приидо́ша от архисинаго́га, глаго́люще, я́ко дщи твоя́ у́мре, что еще́ дви́жеши Учи́теля? Иису́с же а́бие слы́шав сло́во глаго́лемое, глаго́ла архисинаго́гови: не бо́йся, то́кмо ве́руй. И не оста́ви по Себе́ ни еди́наго ити́, то́кмо Петра́ и Иа́кова и Иоа́нна бра́та Иа́ковля. И прии́де в дом архисинаго́гов и ви́де молву́, пла́чущияся и крича́щия мно́го. И вшед глаго́ла им: что мо́лвите и пла́четеся? Отрокови́ца несть умерла́, но спит. И руга́хуся Ему́. Он же изгна́в вся, поя́т отца́ отрокови́цы и ма́терь, и и́же бе́ху с Ним, и вни́де, иде́же бе отрокови́ца лежа́щи. И ем за ру́ку отрокови́цу, глаго́ла ей: талифа́ куми́, е́же есть сказа́емо, деви́це, тебе́ глаго́лю, воста́ни. И а́бие воста́ деви́ца и хожда́ше, бе бо лет двоюна́десяте. И ужасо́шася у́жасом ве́лиим. И запрети́ им мно́го, да никто́же уве́сть сего́, и рече́: дади́те ей я́сти. И изы́де отту́ду и прии́де во оте́чествие Свое́, и по Нем идо́ша ученицы́ Его́.

Лик: Сла́ва Тебе́, Го́споди, сла́ва Тебе́.

И глаго́лет диа́кон ектению́:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

На всякое прошение лик: Го́споди, поми́луй. (Три́жды.)

Еще́ мо́лимся о вели́ком господи́не и отце́ на́шем Святе́йшем Патриа́рхе Кири́лле, и о господи́не на́шем высокопреосвяще́ннейшем митрополи́те (или́: архиепи́скопе, или́: преосвяще́ннейшем епи́скопе, и́мярек) и о всей во Христе́ бра́тии на́шей.

Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Прилага́ет и сия́:

Врачу́ душ и теле́с, со умиле́нием в се́рдце сокруше́нном к Тебе́ припа́даем и, стеня́ще, вопие́м Ти: исцели́ боле́зни, уврачу́й стра́сти душ и теле́с младе́нцев и отроко́в тя́жко боля́щих (имяре́к), и ско́ро воздви́гни их от одра́ боле́зни, мо́лим Ти ся, услы́ши и поми́луй.

О́гненную боле́знь Петро́вы те́щи прикоснове́нием Твои́м исцели́вый, и ны́не лю́те стра́ждущая ча́да Твоя́ (имяре́к) благосе́рдием Твои́м исцели́, здра́вие им ско́ро подава́я, приле́жно мо́лим Ти ся, Исто́чниче цельба́м, услы́ши и поми́луй.

Разсла́бленнаго на одре́ носи́маго воздви́гнувый, та́кожде и де́ти, на руку́ роди́телей свои́х к Тебе́ приноси́мыя, ско́ро от боле́зни воздви́гни, вся́кую не́мощь пло́ти их уста́ви и здра́вы сотвори́, мо́лим Ти ся, Го́споди, услы́ши и поми́луй.

При́зри, Го́споди, Бо́же наш, на моле́ния отце́в и ма́терей (имяре́к), о ча́дех свои́х к Тебе́ взыва́ющих, кре́пость ду́ха с Небесе́ им низпосли́, ду́ши их ми́ром благослови́ и по́мощию Твое́ю заступи́, мо́лим Ти ся, ско́ро услы́ши и ми́лостивно поми́луй.

Свяще́нник возглашáет:

Услы́ши ны, Бо́же, Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны: Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Диа́кон: Го́споду помо́лимся.

Лик: Го́споди, поми́луй.

Свяще́нник глаго́лет моли́тву:

Влады́ко Человеколю́бче, Го́споди Иису́се Христе́, Бо́же наш, долготерпели́вый и многоми́лостивый, ве́лия ми́лость Твоя́ и неизрече́нно милосе́рдие Твое, вся объе́млет любо́вь Твоя́ и ничто́же невозмо́жно Тебе́, а́ще то́кмо восхо́щеши. Ты бо рекл еси́, Го́споди: оста́вите дете́й приходи́ти ко Мне, таковы́х бо есть Ца́рствие Бо́жие, и Иаи́рову дщерь от одра́ сме́ртнаго воздви́гл еси́, и егда́ не́кий царе́в муж, его́же сын боля́ше в Капернау́ме, с наде́ждою приступи́ к Тебе́, рекл еси́ ему́: Иди́, сын твой жив есть.

Сего́ ра́ди мы, гре́шнии и недосто́йнии, к Тебе́ притека́ем и, в покая́нии припа́дающе, мо́лим Тя о ча́дех, младе́нцех и о́троцех неду́гующих и боле́зньми тя́жкими лю́те стра́ждущих: не отри́ни их, к Тебе приходя́щих и ми́лости от Тебе́ ча́ющих, и воздви́гни их от одра́ боле́зненнаго це́лых и всесоверше́нных.

При́зри, Бо́же, и на роди́тели чад боля́щих, уврачу́й сердца́ их скорбя́щая Боже́ственными словесы́ Твои́ми, уныва́ющия укрепи́, во отча́яние впа́дшия возста́ви, испо́лни их ве́ры, наде́жды и упова́ния на ми́лость Твою́.

Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Лик: Ами́нь.

Или́ сию́ моли́тву:

Ми́лостиве Го́споди, Иису́се Христе́, Бо́же наш, помяни́, я́ко звал еси́ младе́нцы к Себе́, чистоту́ их и простоту́ се́рдца их возлюби́в, глаго́лавый нам подо́битися младе́нцем и благоприя́тным Ца́рствию Твоему́ бы́ти. И я́коже деви́ца о́ная, о не́йже рекл еси́, я́ко не умерла́ есть, но спит, егда́ воззва́л еси́ ю, воста́ и здра́ва бысть — и на́ша ча́да воста́ви! Любо́вь Твою́, Го́споди, к де́тем, па́мятующе, мо́лим: восприими́ ча́до сие́ (или́: ча́да сия́) руко́ю Твое́ю и сотвори́ благо́е ему́ (или́: им). Ве́дяще, я́ко вси есмы́ ча́да Твоя́ возлю́бленная, и моля́щеся и за ча́до сие́ (или́: ча́да сия́), про́сим, да вся ны благослови́ши.

Ты бо еси́ жизнь, и любо́вь, и милосе́рдие, Ты еси́ Спас наш и Царь ми́ра. Тебе́, Го́споди, мо́лимся, на Тя упова́ние возлага́ем, не оста́ви нас ми́лостию Твое́ю, но вся ны поми́луй и спаси́, да при́сно Тебе́ сла́ву возсыла́ем со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Лик: Ами́нь.

А́ще изво́лит, присовокупля́ет и сию́ моли́тву,

ко Пресвяте́й Богоро́дице Цели́тельнице[1]:

Приими́, о Всеблагослове́нная и Всемо́щная Госпоже́ Влады́чице Богоро́дице Де́во, сия́ моли́твы, со слеза́ми Тебе́ ны́не приноси́мыя от нас недосто́йных раб Твои́х, ко Твоему́ цельбоно́сному о́бразу пе́ние возсыла́ющих со умиле́нием, я́ко Тебе́ Само́й зде су́щей и вне́млющей моле́нию на́шему. По коему́ждо бо проше́нию исполне́ние твори́ши, ско́рби облегча́еши, немощны́м здра́вие да́руеши, разсла́бленныя и неду́жныя исцеля́еши, от бе́сных бе́сы прогоня́еши, оби́димыя от оби́д избавля́еши, прокаже́нныя очища́еши и ма́лыя де́ти ми́луеши: еще́ же, Госпоже́ Влады́чице Богоро́дице, и от уз и темни́ц свобожда́еши и вся́кия многоразли́чныя стра́сти врачу́еши: вся́ бо су́ть возмо́жна хода́тайством Твои́м к Сы́ну Твоему́, Христу́ Бо́гу на́шему.

О Всепе́тая Ма́ти, Пресвята́я Богоро́дице! Не преста́й моли́тися о нас недосто́йных рабе́х Твои́х, сла́вящих Тя и почита́ющих Тя, и покланя́ющихся со умиле́нием пречи́стому о́бразу Твоему́, и наде́жду иму́щих невозвра́тну и ве́ру несумне́нну к Тебе́, Присноде́ве пресла́вней и непоро́чней, ны́не и при́сно и во ве́ки веко́в.

Лик: Ами́нь.

Диа́кон: Прему́дрость.

Свяще́нник: Пресвята́я Богоро́дице, спаси́ нас.

Лик: Честне́йшую Херуви́м, и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь. Го́споди, поми́луй. (Три́жды.) Благослови́.

Свяще́нник глаго́лет отпу́ст:

Христо́с, И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, святи́теля Луки́, испове́дника, архиепи́скопа Кры́мскаго, святы́х чудотво́рцев и безсре́бреников Космы́ и Дамиа́на, Ки́ра и Иоа́нна, Пантелеи́мона и Ермола́я, Сампсо́на и Диоми́да, Мо́кия и Аники́ты, Фалале́я и Три́фона, всех святы́х отроко́в, святы́х и пра́ведных Богооте́ц Иоаки́ма и А́нны и всех святы́х, поми́лует и спасе́т нас, яко Благ и Человеколю́бец.

Лик: Го́споди, поми́луй. (Три́жды.)

[1] Молитвы, чтомыя на молебнех и инех последованиих. Петроград: Синодальная типография, 1915. Л. 34.